Umutingito Ukomeye muri Myanmar Wahitanye Abantu Barenga 2,000

 Ku wa 28 Werurwe 2025, umutingito ukomeye wari ku gipimo cya 7.7 wibasiye Myanmar, ugahitana abarenga 2,056, mu gihe abandi basaga 3,900 bakomeretse bikomeye. Guverinoma y'iki gihugu yatangaje ko abarenga 300 baburiwe irengero, mu gihe ibikorwa by’ubutabazi bikomeje gushakisha abashobora kuba bagihumeka munsi y’amatongo.

Myanmar yongeye guhura n’icyago gikomeye nyuma y’uko umutingito ukaze wibasiye igice kinini cy’igihugu, usenya amazu, amashuri, n’insengero. Abantu ibihumbi baratakaje ubuzima, abandi benshi bagakomereka, mu gihe abarokotse bakomeje gusaba ubufasha. Leta ya Myanmar yatangaje ko ibi ari bimwe mu byago bikomeye byabayeho mu myaka ya vuba aha, bituma hatangira ibikorwa bikomeye by’ubutabazi.

Nk’uko byatangajwe n’igisirikare cya Myanmar, abantu 2,056 bamaze kumenyekana ko bahitanywe n’uyu mutingito, gusa andi makuru agaragaza ko umubare ushobora kuba urenze uyu. Ibi byago bikomeye byasize abarenga 3,900 bakomeretse bikabije, mu gihe abantu barenga 300 bakomeje kuburirwa irengero.

Ingaruka ku Bidukikije n’Infrastrukture

Leta ya Myanmar yatangaje ko amazu 1,591 yangiritse bikomeye, mu gihe izindi nzu 670 zari zituwemo n’abihaye Imana na zo zasenyutse. Byongeye, amashuri 60 mu gace ka Mandalay, kari mu bilometero 17 uvuye aho umutingo waturutse, yagizweho ingaruka zikomeye.

Ibyabaye ku Barimo Gusenga

Uyu mutingito waje mu gihe Abayisilamu bari mu gisibo cy’ukwezi kwa Ramadan, benshi bakaba bari bagiye gusenga. Byatangajwe ko ababarirwa muri 700 baguye mu misigiti bari barimo ubwo inzu zasenyukaga.

Ibikorwa by’Ubutabazi

Guverinoma ya Myanmar n’abafatanyabikorwa bayo mpuzamahanga batangiye ibikorwa byo gushakisha abari munsi y’ibikuta byasenyutse, no gutanga ubutabazi bw’ibanze. Imiryango mpuzamahanga nka Croix Rouge na ONU iri gutanga ubufasha bwihutirwa mu gutabara abarokotse, aho abaturage babuze aho kuba ndetse n’ibiribwa bikomeje kuba bike.

Umutingito wabaye muri Myanmar ni icyago cyagize ingaruka zikomeye ku baturage no ku bidukikije. Mu gihe ibikorwa by’ubutabazi bikomeje, haracyari impungenge ku mibare nyakuri y’abapfuye n’abakomeretse. Mu gihe Leta n’abafatanyabikorwa bakomeje guhangana n’ingaruka z’iki cyago, ubufasha bw’Isi yose burakenewe kugira ngo abarokotse babone ubufasha bwihuse.