UBUREZI: Umwarimu wa GS Ntete yambitse abanyeshuri babiri bari mu bukene batagiraga unifomo

Ku wa Kabiri tariki ya 30 Nzeri 2025, umwarimu witwa RUKIKAMIHIGO Olivier wigisha mu kigo cy’amashuri cya GS Ntete, giherereye mu Karere ka Gatsibo, Umurenge wa Kiramuruzi, yakoze igikorwa cy’indashyikirwa cyo kwambika abanyeshuri babiri b’abakobwa batagiraga umwambaro w’ishuri kubera ikibazo cy’ubukene. Iki gikorwa cyateye ibyishimo ku banyeshuri, ubuyobozi bw’ishuri, ndetse n’abaturage bo mu mudugudu w’Itaba.Mu Rwanda, uburezi bufite ireme ni inkingi y’iterambere rirambye. Gahunda za Leta zigamije ko buri mwana w’Umunyarwanda abona amahirwe yo kwiga neza, mu buryo buboneye kandi butuma yigirira icyizere. Ariko, mu bice by’icyaro, hari abana bagihura n’imbogamizi zishingiye ku bukene, zirimo no kutagira umwambaro w’ishuri. Muri urwo rwego, igikorwa cyakozwe na Mwalimu RUKIKAMIHIGO Olivier cyagaragaje ko uburezi bufite ireme butangirira ku kwita ku mwana, aho kuba gusa ku masomo. Yambitse abanyeshuri babiri b’abakobwa, NIYOMUBYEYI Julienne na MUKANDAYISENGA Giselle, biga mu mwaka wa gatatu w’amashuri abanza, amajipo y’ishuri, kuko batagiraga unifomo yuzuye bitewe n’ubushobozi buke bw’imiryango yabo.

NIYOMUBYEYI Julienne na MUKANDAYISENGA Giselle ni abana biga mu cyiciro cya mbere cy’amashuri abanza, mu mwaka wa gatatu. Bagaragaje ibyishimo by’ikirenga nyuma yo guhabwa umwambaro w’ishuri. NIYOMUBYEYI Julienne yagize ati:“Twari dufite ipfunwe ryo kwinjira mu ishuri tudasa n’abandi, rimwe na rimwe twumva twasigara mu rugo.” MUKANDAYISENGA Giselle we yongeyeho ati: “Twashimye cyane Mwalimu wacu, kuko yatwibutse kandi atwereka ko turi abana b’ingenzi, nubwo iwacu batabashije kutugurira unifomo.”Mwalimu RUKIKAMIHIGO Olivier yavuze ko icyamuteye gukora iki gikorwa ari umutima wo gufasha no kwita ku mwana w’Umunyarwanda, cyane cyane abari mu bukene. Yagize ati:“Iyo umwana yiga asa nabi, n’ubundi ntiyiga neza uko bikwiye. Umwambaro w’ishuri si ishusho gusa, ni isoko y’isuku, icyizere, n’ubumwe.” Yongeyeho ko ashingiye kuri gahunda ya Leta ivuga ko buri mwana w’Umunyarwanda yiga neza kandi akiga yishimye, yumva ko ari inshingano ye nk’umurezi gufasha aho ubushobozi bw’ababyeyi buba buke.

Ubuyobozi bwa GS Ntete bwashimye cyane iki gikorwa. Umuyobozi w’ishuri UKOBIZABA Emmanuel yavuze ati:“Iki ni igikorwa kintangarugero. Mwalimu RUKIKAMIHIGO Olivier yerekanye ko uburezi bufite ireme kandi butangirira ku kwita ku mwana no kumwereka urukundo nyarwo bityo bikamubera imbarutso yo gutsinda neza. Twifuza ko n’abandi barimu babigira ibyabo cyangwa bakadutungira agatoki ku mwana wese ukeneye ubufasha.” Yongeyeho ko mu gace k’icyaro nk’aka, aho ubushobozi bw’ababyeyi buba buke, ibikorwa nk’ibi bifasha abanyeshuri gukomeza kwiga bafite icyizere, bikaba ari byiza kandi bikenewe cyane.

Iki gikorwa cyagaragaje ko uburezi si amasomo gusa, ahubwo ari n’uburere. Kwereka abana ko bafitiye agaciro ishuri, bituma barushaho kwitwara neza, kwiga neza, no gukunda ishuri. Ni igikorwa gishimangira indangagaciro z’ubumuntu, ubufatanye, n’urukundo. Kandi ni igisubizo ku bibazo by’ubukene bikibangamiye ireme ry’uburezi mu bice bimwe na bimwe by’igihugu.

Ubuyobozi bw’ishuri bwasabye ko n’abandi barimu bashobora gukora ibikorwa nk’ibi babikora, kuko bifasha abana mu buryo bw’imitekerereze, imyitwarire, n’imyigire. Ababyeyi nabo basabwe gukomeza gufatanya n’ishuri mu kwita ku bana, haba mu myambaro, mu mirire, no mu burere. By’umwihariko, hashimangiwe ko ubufatanye hagati y’abarimu n’ababyeyi ari inkingi y’uburezi bufite ireme.

Igikorwa cyakozwe na Mwalimu RUKIKAMIHIGO Olivier cyagaragaje ko uburezi bufite ireme butangirira ku kwita ku mwana nk’umuntu, cyane cyane iyo ahura n’imbogamizi zishingiye ku bukene. Abana bafashijwe bagaragaje ibyishimo, ubuyobozi bw’ishuri bwarashimye, kandi ubutumwa bwageze ku bandi barimu n’ababyeyi. Mu gihe Leta ikomeje gushyira imbere gahunda zo guteza imbere uburezi, ibikorwa nk’ibi bigaragaza ko ubufatanye bw’abarimu, ababyeyi, n’ubuyobozi ari ingenzi mu kurandura ubukene no guteza imbere uburezi bufite ireme.