Ngororero: Abayobozi basabwe gufasha abaturage gusigasira ibimenyetso by’ahabereye ibyaha

Ku wa 29 Nzeri 2025, abayobozi mu nzego zitandukanye bo mu Karere ka Ngororero basabwe gufasha abaturage gusigasira ibimenyetso by’ahabereye icyaha, hagamijwe gutanga ubutabera bwuzuye. Ibi babisabwe mu bukangurambaga bwiswe “Sobanukirwa RFI 2025” bwateguwe n’Ikigo cy’Igihugu cy’Ibimenyetso bishingiye ku Bumenyi n’Ubuhanga bikoreshwa mu Butabera (RFI).

Iki gikorwa cyabereye mu Karere ka Ngororero, cyitabirwa n’abayobozi mu nzego z’ibanze, abashinzwe umutekano, abakozi b’Akarere, n’abandi bayobozi batandukanye. RFI yagaragarije aba bayobozi uburyo serivisi zayo zifasha mu gukusanya no gusesengura ibimenyetso bifasha mu gukemura impaka no gutanga ubutabera bwizewe.

 Nyiransengimana Xaverine, ushinzwe imari n’ubutegetsi mu Murenge wa Kabaya, yavuze ko bungukiye ubumenyi ku buryo bashobora kubungabunga ibimenyetso mu gihe habaye icyaha. Yagize ati:“Twamenye ko dufite uruhare mu kubungabunga ibimenyetso, bikazafasha ubutabera kwihuta no gutangwa mu buryo bwizewe.” Nyirajyambere Marie Chantal, uhagarariye abajyanama b’ubuzima, yavuze ko bagiye gutangiza ubukangurambaga mu baturage, bagasobanura serivisi zitangwa na RFI. Yagize ati:“Hari ukuntu amakuru ya RFI atatugeragaho neza. Ubu twamenye ko dushobora kuyifashisha mu gupima inyandiko mpimbano, tukabona ubutabera.” Pasiteri Munyawera Elizaphane w’Itorero ry’Abadivantisiti mu Murenge wa Nyange, yavuze ko agiye gusangiza abakirisitu be ubumenyi ku buryo bwo kubungabunga ibimenyetso. Ati:“Namenye ko mbere y’uko inzego z’umutekano zihagera, ngomba kuzitira ahabereye icyaha. Sinari nzi ko hari ikigo nk’iki cyadufasha mu gihe twibwe cyangwa habaye icyaha gikomeye.” Mukunduhirwe Benjamin, Umuyobozi w’Akarere ka Ngororero Wungirije ushinzwe imibereho myiza y’abaturage, yasabye abayobozi kwigisha abaturage serivisi za RFI. Yagize ati:“Turifuza ko mu cyumweru gitaha mutangira gusobanurira abaturage serivisi zitangwa na RFI. Bamenye ko bashobora kubona ubutabera bwizewe, ndetse ko n’abakoze ibyaha biyoberanya bashobora gutahurwa.”

Dr. Innocent Nkurunziza, Umuyobozi ushinzwe gupima imibiri y’abitabye Imana muri RFI, yasabye abayobozi kwigisha abaturage uko basigasira ibimenyetso. Ati:“Ahabereye icyaha hagomba gukumirwa ko abantu bahagera. Mugende mubwire abaturage ko bagomba kuzengurutsa akagozi ahabereye icyaha, bagahamagara inzego z’umutekano.”

SP Ashimirwe Japhet, umwe mu bayobozi muri RFI, yasobanuye serivisi zitangwa n’iki kigo zirimo: Gupima uturemangingo ndangasano (DNA),Gupima ibiyobyabwenge mu mubiri,Gupima ibinyobwa n’imiti bitemewe,Gupima imikono n’inyandiko mu gukemura impaka

Ubukangurambaga  “Sobanukirwa RFI 2025” bwagaragaje ko serivisi za RFI ari ingenzi mu gutanga ubutabera bwizewe. Abayobozi basabwe kuba abafatanyabikorwa mu gusobanurira abaturage uko babungabunga ibimenyetso by’ahabereye icyaha, kugira ngo bifashe mu gukemura impaka no kurengera uburenganzira bw’abaturage.